ასია ბიბიმ დატოვა პაკისტანი და კანადაში საკუთარ ოჯახს შეუერთდა

პაკისტანელი ქრისტიანი ასია ბიბი, რომელსაც გასულ წელს სამშობლოში სასიკვდილო განაჩენი გაუუქმეს, უკვე კანადაში იმყოფება.

17 ნახვა
0 გაზიარება
0 კომენტარი

პაკისტანელი ქრისტიანი ასია ბიბი, რომელსაც გასულ წელს სამშობლოში სასიკვდილო განაჩენი გაუუქმეს, უკვე კანადაში იმყოფება. ინფორმაცია ამის შესახებ მისმა ადვოკატმა გაავრცელა.

პანჯაბის პროვინციის მცხოვრები ხუთი შვილის დედა პაკისტანიდან გაიყვანეს, რადგანაც ადგილობრივი ექსტრემისტული ჯგუფები მას მოკვლით ემუქრებოდნენ. როგორც ადვოკატი აცხადებს, კანადაში იმყოფებიან ბიბის შვილებიც, ის უკვე თავის ოჯახთან ერთადაა და მის სიცოცხლეს საფრთხე აღარ ემუქრება.

გასულ წელს, როდესაც უზენაესმა სასამართლომ საერთაშორისო ზეწოლის შედეგად ასიას ისლამის წინააღმდეგ მკრეხელობის ბრალდება მოუხსნა, ამან ქვეყანაში არეულობა გამოიწვია. მუსლიმანი ექსტრემისტები მის სკვდილით დასჯას მოითხოვდნენ, ქუჩაში საბურავებს წვავდნენ და ხმაურს ტეხდნენ, რათა სახელმწიფოს მათთვის ასია გადაეცა.

მთელი ამ ხნის განმავლობაში ბიბიმ რამდენიმე ევროპულ სახელმწიფოს სთხოვა თავშესაფარი, მათ შორის, დიდ ბრიტანეთსაც, თუმცა თითოეული მათგანისგან უარი მიიღო.

შეგახსენებთ, რომ ასია ბიბის − პაკისტანელ ქრისტიან ქალს, 5 შვილის დედას, სასიკვდილო განაჩენი 2010 წელს გამოუტანეს წინასწარმეტყველ მუჰამედის სახელის შეურაცხყოფის ბრალდებით. 2009 წლის ივნისში ის კენკრას კრეფდა სხვა ქალებთან ერთად პანჯაბის პროვინციის ქალაქ ლაჰორში. მან იმავე თასიდან დალია წყალი, საიდანაც მუსლიმანი ქალები სვამდნენ, რაც უკმაყოფილების მიზეზი გახდა.

მუსლიმანი ქალები მას უწმინდურად მიიჩნევდნენ, რის საპასუხოდაც ბიბიმ წარმოთქვა სიტყვები, რომელიც მისი ბრალდების საფუძველი გახდა: „ჩემი ქრისტე მოკვდა ჩემთვის და რა გააკეთა შენთვის მუჰამედმა?“ ამ სიტყვების გამო ის ღვთის გმობაში დაადანაშაულეს, ყოველგვარი სამხილის გარეშე, მხოლოდ მოწმეთა ჩვენებების საფუძველზე.

პაკისტანში მოსახლეობის მხოლოდ 1.6 % არის ქრისტიანი და ისინი განიცდიან დევნასა და შევიწროებას რელიგიურ ნიადაგზე. 1990-იანი წლებიდან დღემდე ღვთის გმობის საფუძველზე დაპატიმრებულთა რიცხვი გაიზარდა. ამ დროის განმავლობაში პაკისტანში 65 ადამიანი მოკლეს რელიგიური მოტივით. პაკისტანი ასევე ხშირად ხვდება იმ საშიში ქვეყნების ჩამონათვალში, სადაც ქრისტიანები დევნას განიცდიან.






Reendex

Must see news